Ilaahay mahaddii khilaafkaa waxa soo afjaray markii wadamada arrimaha Somaliland daneeyey ay soo saareen heshiis la soo dhex dhigay saddexda xisbi, oo ka koobnaa lix qodob oo muhiim ah. Run ahaantii saddexda xisbi qaran lixdii qodob sacabka ayay u garaaceen, qalinkana waa lagu duugay iyada oo aanay jirin cidd ka hadashay, wuxuuna noqday heshiis loo wada riyaaqay waxa soo afjarmay mashruucii la odhan jirey muddo-kordhin,

taas oo in badan soo noqnoqotay. Madaxweyne Rayaale oo isna loo sababaynayey inuu masuul ka yahay qabsoomid la’aanta doorashada Madaxtooyada ayaa wuxuu helay fursad ah in aanay jirin wakhti cayiman oo uu kursiga ka degayo, taas oo ay guurtidu ay uga dhigeen dabo furan mucaaradkuna ku raaceen.

Hadaba markii ay arrintan bedelaadu soo ifbaxday waxa bilaamay in garab ka mid ah labada garab weliba kii u daacadda ahaa Salebaan ay quful ku xidhaan xaruntii golaha ka dibna ay xukuumaddu soo dhoobtay ciidan faro badan. Amar uu soo saaray guddoomiye ku-xigeenka koobaad ayaa lagu amray in labada garab aan midna golaha soo gelin.

Waxa muuqata in khilaafkan guurtida ay xukuumaddu lug ku leedahay sidoo kale ay buunbuuninta iyo dab ku shidida arrintan ay mucaaradkuna qayb ka yihiin, ilaa imika lama garan karo cidda ka faa’iidaysa khilaafkan iyo bedelka guddi hoosadka guurtida. Balse waxa la odhan karaa xukuumadda ayaa wadata mooshin ah haddii la bedelo guddi hoosaadka oo u daacad ah Guddoomiyaha oo aanay xukuumadda isku wanaagsanayn waxaa fududaanaysa in si yar loo ridi karo guddoomiyaha golaha guurtida Saleebaan Maxamuud Aadan, oo in dhawaydba ay isaga iyo Rayaale deeradu dhex miranaysey.

Hadaba isku soo wada duubo khilaafkan taagan oo aan weli xal loo helin xalintiisu waxay ku xidhan tahay is-faham dhex mara shir guddoonka golaha guurtida oo hadda kala qaybsan, xalka golaha iyo jiritaanka golaha guurtidu waxay ku xidhan tahay iyada oo ay tanaasul iyo wada shaqayn la yimaadaan Guddoomiyaha guurtida iyo labadiisa ku-xigeen.