Midabka cas, dhererka, akhlaaqda, dabeecada, dhaqanka wanaagsan iyo shakhsiyada diinta iyo dadnimada leh ayey in badan ku tilmaameen oo ay iigu sheegeen in quruxdu tahay.laakin waxa aad u badnaa inta dabeecada,akhlaaqda iyo dhaqan wanaaga ku sifeeyey quruxuda rasmiga ah.

Ka waran haddii qof aad u cas aad aragto,laakin aan dabeecad iyo dad ladhaqantoona lahayn,ma qof qurux badan ayaa lagu tilmaami karaa mise mid foolxun?

Shucuubta aduunka ee midabada cadaanka iyo casaanka ah leh,oo runtii qaarado badan aduunka ka camira,waxay quruxda u aaminsan yihiin qaarkood in ay tahay iyada oo loo eekaado midabka maariinka ah ee sida chocolate-ka oo kale ah.hase ahaate xaggena waxa inta badan quruxda loo yaqaanaa iyada oo la casaado.

Waxa inta badan la yidhaahda doqon iyo habeen baa madow,haddayse sidaasi tahay qof kasta oo madowi ma doqonbaa.waxay taasi macno ahaan noqoneysaa in qofkasta oo midabka madowga la soo raaciyey uu yahay mid nasiib xun,doqonimaduna waxay soo hoos gelaysaa taasi uun.qof kasta oo casaan la soo raaciyey haddaba isna ma waxa la odhan karaa ,waxa uu wataa haybad aan ka tageynin oo dheeraad ah.

Siyaabo kale duwan ayey runtii maanta u dhaawacday bulshadeena gaar ahaan haweenka, isticmaalka noocyada kale duwan ee dawooyinka midabka wejiga ka badalaa.runtii waxaad arkaysaa hablo badan oo aan ku kalsooneyn naftooda iyo midabkoodiiba oo ku kacaya isbedelo muuqooda wax ka badalaya,sida in wejiga la cadeeyo iyada oo la isticmaalayo dawooyin kimikal ah oo runtii diiniyan,dhaqaniyan iyo caafimaad ahaanba aan u wanaagsaneyn.

Waxaad arkaysaa dumar madow oo isticmaalka dawooyinka wax cadeeya bilaabaya,kadibna u eekanaya muddo kadib caddaan,hadday ku sii wadaana noqonaya sidii sanbabka.waxaad arkeysaa mid madow oo muddo badan isticmaalaysay oo ilaa hadda ay waxba ka qaadi laadahay,jidhkeeda oo adag awgii,waxaadse arkaysaa qaar markii hore casaan u dhashay oo haddana dawooyinkaasi kasii dayaaya casaan ka badan ka ay hadda heystaan.

Waxa isweydiin leh ta madow haba wareerto oo in uu wax kala maqan yahay casaanku ha u aragtee,ta cas ee is marineysa dawooyinkan la isku cadeeyo maxaa ugu wacan?gabadha madowse ma waxay u heysataa in ta casi ay tartan kaga guuleysaneyso?

Dhibta ku gadaaman ama lagala kulmo wejiga diirkiisa laga qaaday,ma yara,waxana ka mid ah in qaarkood laguba naco casaankii ay sameysteen oo dadkiiba ay ka boodeen.cadceeda ma arki karaan,habeen socodna way noqdeen,nabadarada iyo qoonta wejiga soo gaadha sida kuwa dagaalkuna hore uma bugsadaan,dheriga iyo cunto karintuna way ku adkaataa,wejigana wey ka gubtaan.

Haddii lacag badani kaga bixi jirtay sidii ay midabkooda u bedeli lahaayeen,wax mar labaad maanta lacag badani ay kaga baxdaa sidii ay cafimaadkoodii u soo ceshan lahayeen.runtiina hablo badan oo marsaday dawooyinkaasi maanta ma jecla in lagu soo hadal qaado,maxaa yeelay waxay ogaadeen dhibta ay kala kulmeen dawooyinka magaca buufis u keenay.

Runtii maqaalkani waa mid aan ugu talo galay in aan ku soo bandhigo qeyb ka mid ah waayo xanuun badan oo habluhu ay kala kulmaan isticmaalka dawooyinka la isku cadeeyo.si loo ogaado waxa laga macaasho iyo dhibta ku jirta qofka oo sidii ilahay u abuuray in uu badalo damcaa.kuwa keena dawooyinkaasi iyo inta isticmaasha iyo weliba dawladana waxan odhan lahaa midkastaaba doorkiisa uu arintan ku joojinaayo ha ka qaato.