Eeddo Maryan waa ay u roonayd Guuleed markii uu yaraa aad ayayna u dhawri jirtay sidii uu aabbihiisba u dhawri jirtay wiilkiisa ka rajoobay, carruur kalena ma dhalin odeygu, inkastoo uu dhawr jeer guursaday haddana Alle uma garan wax aan Guuleed ka ahayn, dhammaan xaasaskii ka dambeeyay eeddo Maryan wey kala tageen, wuxuuna Xaajigu door biday in uusan mar dambe haween kale haweysan oo uu ku joogo xaaskiisii labaad ee eeddo Maryan.

Markii uu Guuleed eeddadiis si fiican u salaamay ayuu weydiiyay odaygu meesha uu joogo waxayna u sheegtay in uu qolka fadhiga la joogo adeerkiis Rooble, "oo ma adeer Rooblaa jooga,goorma ayuu yimid iyo maxaad iigu soo sheegi weydayn ayuu cod dhawaaq leh ku yiri Guuleed,markii uu galay qolkii ay fadhiyeen odayaashu ayuu ku booday adeerkiis Rooble oo muddo hore isugu dambaysay wuxuuna ku yiri cod kacsan "Adeer goorma ayaad timid maxaase la ii soo wici waayay dhaqso ayaan idiinku imaan lahaaye"

adeer ayaa markaas ku jawaabay "adeer macaan xalay ayaan soo galay caawa ama berritona waan baxaya, xaajiga ayaa ii yeeray oo aan codsigiisa ku imid halkaan"

markaas ayaa Xaaji Axmad wiilkiisa ka codsaday in uu fariisto u dalbayna wax uu cabo, Guuleed ayaa markaas hadalkii qaatay oo yiri "maxaa dhacay kheyr lee sow ma jiraan adeer imaatinkiisaan degdegga ah, sidee ayay wax u jiraan aabbe? markaas ayuu haddana sii raaaciyay maantana waxaa la ii sheegay in aad i doon doonaysay oo iigu timid shaqada,

Xaajiga ayaa markaas wiilkiisii ugu jawaabay "kheyr weyn ayaa jira anigaana adeerkaa u yeeray sababtii aan ugu yeerayna waan u sheegay oo wuu og yahay, waana u mahadcelinaya walaalkay sidii uu u soo dhoweeyay taladaydii iyo fikraddii aan u sheegay, hadeerna adiga ayaan kuu sheegaya waxaana rajeynaya gacmihii furnaa ee uu adeerkaa igu soo dhoweeyay in aad igu soo dhoweyn doontid"

Guuleed ayaan weli fahmin waxa uu aabbihiis wado iyo dhammaan waxa uu u dan leeyahay, wuxuuse jeclaystay in uu maqlo warka odayga wuxuuna yiri "waa yahay aabbe dabcan waan soo dhoweynaya wax kasta oo aad weydiisato ama iga codsato marka horese aan ogaado"

Guuleed ayaa markii uu cabbaar aamusnaa garan waayayna wax uu yiraahdo haseyeeshe aan doonaynin in uu warkan sii socdo ku yiri aabbihiis iyo adeerkiis "waqti i siiya si aan arrinkan uga soo fekero"

Xaaji Axmad ayaa markaas yiri haddaba isku kaaya keen Jimcaha marka salaadda jimce la soo tukado, walaalkayna ha iska baxo berri kollay markii ay xaajaduna noo dhammaato wuu soo noqon karaaye"

Guuleed ayaa intuu is celin waayay markaas la soo booday "maya aabbe jimcaha waa fog yahay ee ma ka soo horumarin kartaa" Xaajiga ayaa markaas yiri goorma ayaad haddaba jeceshahay"

Guuleed ayaa ku jawaabay "berritaba ka warrama inta uusan adeer bixin" Adeer Rooble ayaa markaas oo dhex galay oo yiri Guuleed hadduuba berrito doonayo anigu waan sugi karaa wax dhib ah oo ay taasi igu hayso ma jirto"Xaajiga ayaa markaas oggolaaday in berrito salaadda casar ka dib lagu kulmo gurigiisa.

Guuleed ayaa markaas istaagay isaga oo ciriiri dareemaya islamarkaana isula muuqda dambiile, maadaama uu fadhiyo meel uu isleeyahay waxaa lagu shirqoolayaa xaaskiisa Sucdi, Sucdi hore ayay ugu sheegtay haddii uu naag kale la damco in ay u kala dhammaatay ama iskaga tegayso.

Guuleed isagoo aan caadi ahayn ayuu macasalaameeyay aabbihiis iyo adeerkiis wuxuuna orod uga baxay albaakii gurgii aabbihiis, intii uu waddada ku soo jiray ayuu wuxuu la sheekaysanayay naftiisa, isagoo iskula hadlayay ereyo ay ka mid ahaayeen "adduunka waxaan laga noolaan kareynin dadka kuugu dhow ee ehelka kuu ah, sidee ayay ku dhici kartaa in uu aabbahay isku dayo in uu talo iga siiyo ciddii aan guursan karo iyo arrimo ka mid ah noloshayda gaarka ah,

waa yaab adduunka inta aad joogtid wax kasta waad la kulmaysa, weligeyse ma filayn in uu aabbahay taladan oo kale iila yimaado waliba go’aan iska gaaro oo ii doon doono gabar kale oo aan guursado isagoo aan igala tashan, nasiib wanaag jawaab waan u hayaa, Sucdise sideen ugu sheegaa taladan lidka ku ah nolosheena, haddii aan ka qariya waxaan ka galay dembi oo dhaqan uma lihi in aan wax ka qariyo, haddii aan u sheegana waxaan ka baqayaa in ay ka naxdo, inkastoo aanan weligey yeelaynin in aan sameeyo wax la mid ah fikradahaan oo kale iyo wax u dhowba..

Guuleed isagoo weli isla hadlaya ayuu soo galay gurigiisii, markiiba wuxuu weydiiyay meeday Sucdi, Xaawa ayaa markaas u sheegtay in Sucdi aysan weli soo toosin oo ay jiifto, Guuleed ayaa warkaas aad uga naxay kuna canaantay Xaawa waxa loo toosin waayay oo loogu geyn waayay raashin iyo wixii kale ee ay u baahan tahay, Xaawa ayaa ka naxday carrada Guuleed oo aysan runtii uga baran in uu ku qayliyo kuna jawaabtay. "Abow sow adiga imaad oranin yaanan loo gelin Sucdi qolka ay jiifto, aniga warkaagii ayaan dhowraayay sidaas ayaana u toosin waayay Sucdi, Guuleed ayaa markaas ka xumaaday in uu ku caro baxay Xaawa oo aan waxba samaynin keliya in ay ka soo baxday ballankii ay qaaday mooyaane,

wuxuuna ka codsaday cafis oo ku yiri "raalli iga ahow abbaayo waan illoobay in aan sidaas ku iriye" wuxuuna u soo dhaqaaqay qolkii ay Sucdi jiiftay markii uu albaaka furay ayay ku toostay Sucdi shanqartii Guuleed waxaana Guuleed indhihiisii qabtay waraaqdii saarnayd laabta xaaskiisa,

Sucdi ayaa damacday markaas in ay ka qaado waraaqda laabteeda oo ay ka qariso Guuleed, "maxaad qarinaysa xabiibi waan kuu jeedaa ee i tus warqaddaad gacanta ku haysid." ayuu ku yiri

"maya hadhow ayaan ku tusaa weli ma aanan dhammaynin" ayay tiri Sucdi,

"hadeer i tus waan ku baryayaa ma sugi karo hadhow" ayuu ku baryootamay Guuleed.

"Haddaba hal ii ballan qaad "ayay kula ballantay,wuxuu ugu jawaabay cod aan samir la socon..Wax kasta oo aad doonto waan kuu samaynaya ee iga codso" intii ay warqaddii u dhiibtay ayay ka bariday in uu meel kale ku akhristo.

Guuleed markuu akhriyo warqadda, muxuu noqon doona, waa inoo qaybta afaraad inshaa Allah

Waxaa Qortay Zahra Abdi Hersi
Holland