Markaliyo dhaliishii
Anigoon hal dhaafayn
Dheegoow ogsoonoow
Waxan dhabanka yaabkii
Sacab ugu dhirbaaxay
Dhibkaad adigu beertaa
Anigana I dhaawacay
Dhudi diiday caawimo
Inay dhami I siisoo
Baadi taan u dheelmaday
Jidku dhama’a mooyee
Weli dhinucu muu ladin
Hurdo dhigay warkeedii
Jidhka dhidid ka hooryoo
Afku dhiidhi muu dayn
Balse dhawr su’aalee
Dhalintaan jeclaayeey
Miyuu dhaadsigiin jirin

Siday dheriga xaabadu
Uga dhaliso qiiqaan
Ana dhamac ku beeraa
Murti dhigasho suugaan
Si’an dhagaha xuubkood
Waxan manta dheehdiyo
Beritaba wixii dhiman
Hadna ugu dhibceeyo
Inta maan ka dhaadhici

Balse maxaad dhasiigiyo
Ani dhaawacaygiyo
Dhibka uga helaysaan

Ma kolaan dhaqaaliyo
Hawlo aniga ii dhana
Ii dhameeya leeyahay

Waxa gama’a dheershee
Hurdo iga dhantaalay
Igu dhaliyay baaqana
Dhaqan weeye meel gala
Iyo dhaxal la eegto
Dhayal lagu helaynoo
Saami lala dhigaa jirin

Ogow dhabar adaygaba
Dhalintaan jeclaayeey
Ninka dhaliya guushu
Inu dheemantii helay
Dhaqo lagu ogaanjiray

Waxan dhuuxa maansada
Ama dhidibka weedhaha
Dhexmuquurshay xaajada
Nin dhibkiisu muuqdaa
Dhaymo lagu dayaaye
Ani dhaawacaygani
Dhalintaan jeclaayeey
In ka dhiijinaysiyo
Intii dhaafi mooyee
Inta dhaada maan arag

Runtu dhadhan ma diidee
Wuxu culaygu dhiishii
Burcad dhalasho keenay
In dhalaanka awgii
Saca dhiija caanuhu
Dhalin waayay xoorkii
Ana dhugashadoodiyo
Dhursugooda maan helin

Bal hadaba dhagwayneey
Inta dheeg warkaygani
Dhibihaayo maankii
Ama dhudi la yaabkeed
Rajo dhalinin baaqani
Dhaqan guuraybaa badan

Waxse dhibi garaadkay
Markalena I dhaawici
Dhalinyahay su’aalee
Halkeen dhaadka dunidani
Dharabkay ku yeelaa
Hidahay ku dhawrtaa
Damqashadu dhab weeyee
Alloow yaa dhibaatada
Ila qaban dhankiisoo
Isna dhaliya aayaha
Lagu dhaqan ilaasho

Sida dhibica roobaad
Ama danab dhawaaqii
Codka sare u dhaadheer
Ereyada dhinbiisha ah
Dhuuntu xiiqi waydoo
Waxa dhididka keenay
Ama dhaliyay oonkaba
Nin dharkayga qaatoo
Dhiig miiray waa hore
Inta dheeg I diidiyo
Dhudi inan la daawado

Dhalintaan jeclaayeey
Nin dhurwaa ka liitaa
Intu dheefta beegsaday
Madhi dhuunigaygii

Bal hadaba dhawaanshaha
Calashaan dhaqaaq jiidh
Kiinee u dhiiran
Dhakhso diira aaxdii
Ana ila dhibtoodoon
Dhalashada wadaagnaa

Horta dhuuxa weedhoo
Ma ogtihiin dhamaantiin
Inaan nahay dhalaankii
Awoow uu ku dhaatee
Abtirsiinta dheeriyo
Dhalashada wadaagee
Abidkood is dhaafayn

Dhankalena hadaan dayo
Ninka caano soo dhamay
Ama dhabarka hooyada
Qaydka dhinaca haystay
Dhab ahaan walaalkay
Iyo waa dhigaygii

Waxan dhidibka maansada
Hadba udub ku dhawraba
Seeto dhigay talaabada
Idinkuna dhamaantiin
Is banbaansha dheegoow
Dhudiyeey u roonoow
Huga dhinaca kuu sudhan
Dhaclahaaga eegoo
Ha dhaqaaqin goortuu
Sadexqayd dhinaado
Ama dhaxal awoowgeen
Dhimashada la nooc yahay